ایران نے فیلڈ مارشل

ایران نے فیلڈ مارشل سید عاصم منیر کے حالیہ دورۂ ایران کو انتہائی مثبت قرار دیتے ہوئے کہا ہے کہ دورے کے دوران اہم سفارتی کامیابیاں حاصل ہوئی ہیں اور اس کے نتائج جلد سامنے آنا شروع ہوجائیں گے۔

ایرانی صدر مسعود پزشکیان کے دفتر سے جاری بیان کے مطابق فیلڈ مارشل عاصم منیر کے دورۂ ایران کے دوران اہم امور پر مثبت پیش رفت ہوئی۔ ایرانی وزیر داخلہ اسکندر مومنی نے بھی کہا کہ اعلیٰ ایرانی عہدیداروں اور پاکستانی حکام کے درمیان ملاقاتیں انتہائی خوشگوار اور مثبت ماحول میں ہوئیں۔

اس سے قبل آئی ایس پی آر کے مطابق فیلڈ مارشل عاصم منیر نے ایرانی صدر مسعود پزشکیان اور دیگر اعلیٰ حکام سے ملاقاتیں کیں، جن میں ایران امریکا تنازع، مشرق وسطیٰ میں کشیدگی میں کمی، آبنائے ہرمز کو دوبارہ کھولنے کی کوششوں اور علاقائی امن کے لیے تنازعات کو مذاکرات کے ذریعے حل کرنے کے طریقۂ کار پر تبادلہ خیال کیا گیا۔

آئی ایس پی آر کے مطابق ایرانی قیادت نے مذاکرات، کشیدگی میں کمی اور تنازع کے پُرامن حل میں سہولت کاری کے لیے پاکستان کے تعمیری کردار اور مخلصانہ کوششوں کو سراہا۔

حکام کے مطابق پاکستان کی سفارتی کوششوں کا مقصد خطے میں کشیدگی کم کرنا، امن و استحکام کو فروغ دینا اور تنازعات کے پرامن حل کے لیے مذاکراتی عمل کو آگے بڑھانا ہے۔